Soños

Acércase a horiña de deitarse, apresúrome cara o meu habitáculo que máis que un dormitorio semella ser un santuario hindú. Miña nai aborrece entrar nel.

Déitome logo de asearme. Estiro o meu brazo cara a parede e apago a luz. A escuras observo as estrelas e lúas que enchen as paredes e o teito de múltiples formas. É a miña particular nana silenciosa.

Os ollos cansos vanse pechando, máis a miña mente segue a cabilar. Espirais luminosas rondan polo cerebro entumecido ata que a mente se perde no infinito. Adéntrome entón nun profundo pesadelo enchido de pena e amargura; incontrolable e insensible. O meu incansable sono alterna historias ansiosas con fugaces visións de esperanza.

Como de costume, soa o espertador. Apágalo inconsciente. Segues a explora-los soños infindos. De súpeto espertas cos ollos ben abertos, aflixida e aturdida. Tratas de saír do berce, mailo corpo case desmaiado, impídecho. Conséguelo. Comeza un novo día.

Algúns padecen insomnio; outros, soños tan profundos que nin sequera recordan; eu, érgome agotada, como se acabaran de botarme un grande peso por riba.

Preguiza, agotamento, desmaio, sopor, insensibilidade, entumecemento...
Delirio, ensoño, trance, desvarío, alucinación, dor, anhelo, ansia, dúbida, espexismo...
Xadeo, debilidade, sofoco, mareo, desalento...
Renacemento, resurrección, compensación, calma, respiro, actividade...

Acércase a horiña de deitarse, apresúrome cara o meu berce. Comezo a soñar.